तरुणाची झाडाला गळफास घेऊन आत्महत्या

खडकीतील होळकर पूल नदीपात्रातील उद्यानात प्रकार उघड अशोक बालगुडे पुणे, दि. 27 ः खडकीतील होळकर पूल नदीपात्रात तरुणाने झाडाला गळफास घेऊन आत्महत्या केली. अमोल रमेश मंगळवेढेकर (वय ३५, रा. वडारवाडी, शिवाजीनगर) असे आत्महत्या केलेल्या तरुणाचे नाव आहे. पोलिसांनी सांगितले की, खडकीतील होळकर पूल परिसरात नदीपात्रातातील उद्यानामध्ये झाडाला लटकलेल्या अवस्थेतील मृतदेह नागरिकांना पहाटे दिसला. नागरिकांनी या बाबतची माहिती विश्रांतवाडी पोलिसांना दिली. पोलिसांनी घटनास्थळी भेट दिली. त्याच्याकडे असलेल्या कागदपत्रांवरुन पोलिसांनी ओळख पटवली. अमोल याच्या आत्महत्येमागचे निश्चित कारण समजू शकले नाही. त्याचा कोणाशी वाद झाला का?, यादृष्टीने पोलिसांकडून तपास करण्यात येत आहे. याप्रकरणी विश्रांतवाडी पोलीस ठाण्यात अकस्मात मृत्यू अशी नोंद करण्यात आली आहे.