नवले पुल यमदूतच... ट्रकच्या धडकेत पुन्हा दुचाकीस्वाराचा मृत्यू

ट्रकचालक अटकेत ःसिग्नलला थांबलेल्या वाहनांना सिमेंटने भरलेल्या ट्रकची धडक अशोक बालगुडे पुणे, दि. 26 ः मुंबई-बंगळुरू बाह्यवळण मार्गावर नवले पुलाजवळ सिग्नलला थांबलेल्या वाहनांना सिमेंट वाहतूक करणाऱ्या भरधाव ट्रकने धडक दिली. त्यामध्ये दुचाकीस्वाराचा मृत्यू झाला, तर पादचारी महिला जखमी झाली आहे. संदेश बानदा खेडकर (वय ३४ वर्षे, रा. टिळेकर नगर, कात्रज- कोंढवा रस्ता) असे अपघातात मृत्यू झालेल्याचे नाव आहे. याप्रकरणी ट्रकचालक पंकज राजाराम नटकरे (वय २१, रा. बसवकल्याण, बिदर, कर्नाटक) याला सिंहगड रस्ता पोलिसांनी अटक केली. पोलिसांनी सांगितले की, नवले पूल परिसरात सिग्नलवर वाहने थांबली होती. बुधवारी (दि. 25 ऑक्टोबर, 2023) सकाळी दहाच्या सुमारास पाठीमागून भरधाव वेगातील ट्रकचालकाचे नियंत्रण सुटले. ट्रकने चार ते पाच वाहनांना धडक दिली. अपघातात दुचाकीस्वार संदेश गंभीर जखमी झाले, तसेच एक पादचारी महिला जखमी झाली. संदेश यांना तातडीने खासगी रुग्णालयात दाखल करण्यात आले. उपचारांपूर्वीच त्यांचा मृत्यू झाला होता. अपघातानंतर बाह्यवळण मार्गावरील वाहतूक काही काळ वाहतूक विस्कळीत झाली होती. वाहतूक पोलिसांनी अपघातग्रस्त वाहने बाजूला काढली. त्यानंतरवाहतूक सुरळीत झाली, अशी माहिती सिंहगड वाहतूक विभागाचे सहायक पोलीस निरीक्षक पांडुरंग वाघमारे यांनी दिली.