मांजरी उपबाजारात कोथिंबीर, मेथी, फ्लॉवरने खाल्ला भाव कल्याणराव कोतवाल ः आवक वाढल्याने टोमॅटोचे दर घसरले, पाले-भाज्यांचे दर स्थिर अशोक बालगुडे पुणे, दि. 15 ः शेवाळेवाडी (ता.हवेली) येथील कृषी उत्पन्न बाजार समितीच्या मांजरी उपबाजारमध्ये मेथी, फ्लॉवर आणि कोथिंबीने भाव खाल्ला. टोमॅटोची आवक वाढल्याने भाव घसरले असून, इतर पालेभाज्यांचे भाव स्थिर असल्याचे मांजरी उपबाजारप्रमुख कल्याणराव कोतवाल यांनी सांगितले. याप्रसंगी किरण घुले, राहुल शेवाळे, केतल घुले, लालासाहेब जाधव, रावसाहेब तावरे, श्रीकांत भंडारी, समीर घुले, गणेश शिंदे आणि शेतकरी-व्यापारी मोठ्या संख्येने उपस्थित होते. कोतवाल म्हणाले की, शेतकरी ते थेट व्यापारी अशी मांजरी उपबाजाराची सर्वदूर ओळख आहे. जिल्ह्यातील कानाकोपऱ्यातील शेतकरी सकाळी ताजा तरकारी घेऊन येतात, त्यामुळे या बाजारातील तरकारी खरेदीला व्यापारी पसंती देत आहेत. पिंपरी-चिंचवड आणि पुणे शहरातील व्यापारी येथे शेतमाल खरेदीसाठी येतात. शेतकरी-व्यापाऱ्यांची कोणतीही अडचण होणार नाही, यासाठी प्रशासनाच्या वतीने योग्य खबरदारी घेतली जात आहे, असे त्यांनी सांगितले. दरम्यान, वरुणराजाने ओढ दिल्यामुळे शेतकऱ्यांच्या तोंडचे पाणी पळाले आहे. उन्हाळ्यामध्ये तरकारीला पाणी कमी पडणार अशी चिंता शेतकऱ्यांना भेडसावू लागली आहे. आताच विहिरी आणि बोअरवेलने तळ गाठला आहे, अशी खंत जिल्ह्यातील अनेक शेतकऱ्यांनी व्यक्त केली.